حقوقي فين يا ليبراليين يا بلاستيك ؟ | الحلقة ١٠ كاملة

الحلقة العاشرة

ما هي افكار الفليسوف جون لوك وعلاقتها بالوضع الحالي ؟
يعتبر جون لوك من أباء الليبرالية
في تلك الحلقة نناقش افكار جون لوك ونقارنها بأفكار توماس هوبز
حيث نتعرض لمفهوم الحريات الثلاثة عند لوك ( الحياة و التملك و الحرية) وافكاره ضدد الحكم المطلق ثم نعرض افكاره عن التسامح الديني ومنع استخدام الدولة كأداه لفرض الدين
وفي النصف الثاني ننقد افكار جون لوك من حيث انها ابسط من ما نوجهه في العصر الحالي

واخيرا اختبار الليبرالي البلاستيك لمعرفة اذا كان صديقك او قريبك الذي يدعي الليبرالية فعلا ليبرالي ام ليبرالي بلاستيك

سكريبت الحلقة

(1)

فى الجزء الاول من برنامجنا اتكلمنا عن ام السياسة بتاعتنا فى الوطن العربى و زى ما اتكلمنا عن الفلاسفه اللى أثروا فى الوضع بتاع ام السياسة عندنا برضو هنتكلم عن الفلاسفة اللى أثروا عندهم.

(فيديو)انا مواطن مصرى و عندى حقوق مصرية

(2)

في حلقة توماس هوبس اللي شفنها كان فيه كام سؤال مهم جداً كان اتطرح,

السؤال كان ايه هو الحد الفاصل بين السكوت على الحاكم الظالم الفاسد الفاشل علشان الخوف من الفوضى و بين انى اطلع ضده و أقول لأ بقا كفايه كده.

يعنى إيه اللى ممكن أسكت عليه و إيه اللى لو الدولة خدته مينعش أسكت ولازم أتحرك ضدها؟

و كمان هو ايه اللى بيدى شرعية للدولة؟ هل هى قدرتها ان هى تحميك من الفوضى وبس كدة ولا هى محتاجه موافقتك؟
و أخيراً الدين و الدولة هل الدولة ليها الحق تفرض دين علي اساس انه الدين الصح ؟

(٣)

الفيلسوف الإنجليزى جون لوك حاول يجاوب علي الاسئلة دية.

جون لوك أفكاره كانت مختلفه كتير عن توماس هوبس, هو أه عمره ما ذكره رسمياً فى كتاباته ويكتب كانه بيرد علي واحد اسمة روبرت فيلمر, بس لما تقر لجون لوك تحس انه كاتب علشان يفند افكار توماس هوبس.

(فيديو) يا خلبوص

(٤)

توماس هوبس كان شايف ان الحاكم مش بيحكم على أساس دينى و لكن هو موجود علشان يحمينا من بعض لأننا بطبيعتنا وحوش و كمان كان بيقول اننا ملناش اى سيطرة على الدولة وسلطتها مطلقة و بموجب العقد الإجتماعى فأحنا ملناش نعدله

و برغم من ان جون لوك مستمد أفكاره من أساس دينى لكنه اتفق مع هوبس فى ان الحاكم ده معهندوش حق الهى ولا هو متعين من ربنا ذي مكان منتشر في اوربا زمان لكنه أختلف مع هوبس فى باقى الحاجات.

(٥)

لوك بروح الدين كان شايف ان اى شخص ليه حبة حقوق مينفعش اى حد ينتزعها منه سواء دولة أو أشخاص لأن الحقوق دى ربنا أداها لأدم و فضلت من بعد أدم تتوارثها.

الحقوق دى هى حق الحياة و الحرية و التملك وحتي لو حكومة منتخبة برضة ما تعرفش تاخد الحقوق دية من شخص معين.

(فيديو) ينصر دينك يا استاذ خليفه

(٦)

أما بالنسبة للعقد الإجتماعى عند جون لوك فهو برضو كان مختلف فيه عن توماس هوبس

جون لوك شاف ان العقد ده اتفاق بينى و بين اللى بيحكمنى فى انه يحمى ليا الحقوق التلاته دول و يخلينى استمتع بيهم لأبعد حد و اللى مكنتش هوصله بالكفاءه دى لولا وجود الدولة

لوك بعكس توماس هوبس فى موضوع الحياة الطبيعية لوك كان شايف ان الناس فيها حرية مطلقة و مش زفت اوي ذي ما هوبس تخيلها.

يعني تحس ان لوك بيقولك ان وظيفة الدولة مش انها تحميك من الفوضي لا دة عشان تضمن الحقوق الثلاثة دول وبناء علي كدة ما ينفعش الدولة تقتل وتقمع حريتي وتاخد املاكي وتقولي مش احسن من سوريا والعراق
لا الدولة موجود عشان تضمني التلات حاجات دول ودة اللي بيشرع وجودها من اصله

(فيديو)

(7)

العقداللي بيني وبين الدولة بالنسبة لجون لوك مش ابدي ولا حاجة ذي بتاع هوبس لا دة في موافقة كشرط من شروط استمراره و علشان كده لازم يكون فيه طريقه نقدر نقبس بيها الموافقه
. شكلها اية الموافقة دية وازاي نعملها دة سوال تاني بس موافقة الناس اصبحت عنصر مهم في العقد الاجتماعي بتاع لوك

وكان جون لوك بيقول يعنى و الله لو الحكومة اللى انا اخترتها فشلت انها توفر ليا الحماية للتلات حقوق الأساسيين بتوعى فأنا هيكون من حقى اطلب انها تتكل على الله و تمشى.

(فيديو) يالا انجروا من هنا و خدوا الراجل العره ده معاكوا

يعني جون لوك لو كان عايش معانا دلوقتى غالبا هتلاقيه موافق و مؤيد جدا للثورات الربيع العربى لأن هنا الناس عبرت عن عدم موافقتها على الحكومة و الدولة وخرجت

دة لان الناس لازم يكون عندها الحق و القدرة تشيل الحكومة ودة بيتسمي ساعات الحق فى الثورة,

يعنى من الأخر مفيش الكلام بتاع هوبس عن الحكم المطلق, الحاكم هنا ليه حدود يلتزم بيها و واجبات لازم يعملها و لو مقدرش يلتزم بده فيلم هدومه و يطلع بره بالذوق او بالعافية لو امكن.

(٨)

موضوع الحقوق التلاتة بتوع جون لوك كانوا مدخل مهم لمفهوم حقوق الانسان بتاعت الايام دية  مع ان طبعا الموضوع بقا اكبر بكتير من التلات حقوق بتاعت لوك بس فكرة ان في حقوق لاي انسان مفيش حد او جهة او دولة تقدر تاخدها منه مستمدة من افكار لوك اللي هوا اسمتدها من فهمه للمسيحية

وكمان افكار جون لوك اثرت كتير علي الاباء المؤسسين لامريكا لدرجة انهم كانوا بينقلوا شوية حاجات كدة وش

(٩)

اما بالنسبة لفكرة الدين و الدولة, و برغم من ان جون لوك كان مستمد أفكاره من الدين و الإنجيل و لكن لوك برضة كان متأثر بالحروب الدينية بين الدول و بعضها أو جوة الدول نفسها بين الكاثولك والبرتستانت وكل الكنايس التانية فشاف ان الحل في دة ان يكون الدين حاجه و الدولة حاجه تانيه.

ودافع لوك للفكرة دية هو ان كل واحد كان بيبقى شايف ان دينه هو اللى صح و دة حيخلية بياخد الدولة كأداة لفرض الدين ده على باقى الناس.

وطالما ان الدولة من وجهة نظره دورها محدد فى حماية ال 3 حقوق للى اتكلمنا عليهم وطالما ان الدين دة علاقة الإنسان بربه فلازم نمنع إستخدام الدولة كأداه لفرض الدين لان دة هيخلينا نواجه كذا مشكله:

(10)

المشكلة الأولى:هو مين اللى هيحكم ان ده الدين الصح و ده الدين الغلط ؟ أصل مفيش مفيش حد هيفضل متمسك بدينه لو هو شايف انه هو غلط.

مين اللى هيحكم بقا فى الليلة دى؟ احنا كده لو أستخدمنا الدولة كأداة لفرض الدين, اللى هيقدر يوصل للحكم و بستخدم الدولة بكفاءه هو اللى هيقدر يفرض دينه فاالحكاية مش دين الصح ولا حاجة دة بالدراع .

المشكله التانيه: هل لما يتم فرض الدين, ده هيطلع ناس مؤمنين؟ يعنى انا لما اخليك تصلى بالعافيه و المسدس فوق راسك

هل كده فعلا الدين اكتسب تابع جديد ولا انا بس اتبسطت ان انا اجبرتك و زودت العدد بتاعنا؟

والمشكلة التالتة ان العنف اللى احنا هنستخدمه علشان نخلى الناس اللى جوه المجتمع تغير دينها او تتبع دين معين, تأثيره إجتماعياً هيكون أسوأ بكتير من التسامح و إحنا نقبل بناس تانيين علي دين تاني.

(فيديو) ماتنطق ياد مين اللي قتلة

(11)

الكلام ده كله جميل جداً وطبعا واضح ان افكار لوك عن تحديد سلطات الحاكم وادخال عنصر الموافق كشرط ووجود حقوق محدش يقدر يقربلها يخلينا نحط لوك في حلاط ام السياسية بتاعتهم بس اكيد مش بتاعتنا اليومين دول

. بس زى ما اتعودنا اى فكرة أو فلسفة بيكون حواليها شوية تساؤلات أو مشاكل كده يعنى: فخلينا نفكر شوية في الكلام اللي قاله جون لوك

1- جون لوك كان شايف ان الناس لازم يكون عندها الحق و القدرة على تغيير الحكام وحط خط تحت كلمة القدرة دية , و هنا هو مش بيتكلم بس عن حاجه زى الإنتخابات هو كمان يقصد الحق فى الثورة.

فيه ناس هنا بتوقف فكرة الحق فى الثورة عند حد معين و منع حمل السلاح, بس لومش حتفسر كلام لوك بالطريقة دية فده معناه ان لو اى حاكم قرب لل تلات حقوق الأساسيين دول احنا نطلع عليه بالسلاح نمشيه و ده ببساطه أسرع طريق للحرب الأهلية
اهوا دة تعريف كلمة الخروج علي الحاكم عن بعض الاسلاميين واللي بيحرموا لانه خروج مسلح ومش موضوعنا دلوقتي هل علي الحاكم المتغلب ولا لا
المهم ان موضوع امتلاك الناس القدرة علي الثورة دية ممكن يفتح الباب لحروب اهلية او ان كل واحد يكون معاه سلاح احتياطي.

(12)

تاني خاطر حيجبلنا في افكار جون لوك انه كان شايف ان الحالة الطبيعية اللي قبل الدولة موجودة و بتتسم بالسلام والناس تطورت منها وعملت عقد اجتماعي , مهوا دة نفس مشكلتنا مع هويس
لان الحالة الطبيعية دى فرضية محدش قدر يثبتها الا لو معاه الة زمن ونشوف سعاتها

اي نعم لوك كان ا بيفترض ان الحالة الطبيعية كانت كويسه و استمد منها ال 3 حقوق.

بس بصراحة احنا لازم نقف و نفكر شوية فى موضوع انها كانت مسالمه ده, بالذات ان فيه أوقات كتير لو الناس اتسابلها الحبل بيقتلوا و يسرقوا و يحرقوا

فموضوع الحالة الطبيعية دة احنا ممكن ناخد وندي فيه

(13)

تالت خاطر يجيلنا علي افكار جون لوك

الحق فى التملك دة موضوع لوحدة لان في ناس بتشوف ان جون لوك كان بيتكلم عن الاراضي والعقارات وبس ومش حينفع ناخد افكاره ابعد من كدة لان شاف ان حق المليكة جة من اختلاط المجهود بالشئ يعني في راي جون لوك انا لو شوفت شوية حجارة و عملت منهم تمثال بمجهودي دة معناه ان التمثال دة بتاعي ولي حق في ملكيتة
طيب حنعمل اية في حقوق الملكية الفكرية و الممتلكات العامة والحاجات الطبيعية في الطبيعة ابسطالهاك بالمثال بتاع ربورت نوزك اللي اتكلمنا عنه قبل كدة وهوا بيرود علي جون لوك وبيقوله لو انا جيب ازازة صلصة انا اللي عملها وخلطها باه البحر وقلبت كويس هل البحر بقا بتاعي كدة ولا عبيط وكبيت ازازة الصلصة في البحر ببساطة مفهوك مفهوم الملكية دلوقتي بقا اعقد من افكار جون لوك

(14)

الخاطر الرابع اللي ممكن يجيبنا
هولو الدولة هنا شغلتها المحافظ علي الحقوق التلاتة دول هل الضرائب دة اعتداء علي حق الملكية ؟ ما في الاخر الدولة بتيجي وتاخد حاجة مني ؟ طيب لو قولنا الضرائب دية الدولة بتاخدها عشان الامن والجيش وهكذا فانا بستفيد منها طيب لو الدولة خدت الضرائب دية وادتها للفقراء مش دة برضة اعتداء علي الملكية لان دة مجهودي اللي الدولة خدته وعايز تتديه لحد معرفوش ؟ ببساطة لو شدينا خط بتاع افكار لوك الدولة مش حيكون ليها اي دور في الرعاية الاجتماعية والصحية واللي معهوش ما يلزموش لان الدولة مش حتاخد فلوس من حد تدي التاني حتي لو كان فقير معدم علي ترابزيت العمليات
وفي ناس بتاخد الحتة دية بس من فكر جون لوك وتسمية ابو اليبراللية وتفكها من الحريات ودول حنرجعلهم اخر الحلقة

(فيديو)

(15)

اما بقا موضوع الفصل بين الدولة و الكنبسة وافكاره عن التسامح فبرضو فيه حبة تساؤلات

اولا في تفسيرات بتقول انه مكنش متسامح اوي كدة مع كل الاديان يعني والملجدين وكنايس معينة يعني في شوية كلام بناء علي التفسيرات دية

بس الاهم: هل كل الاديان لازم تفصل بين الدين والدولة تمام ولا دة حاله خاصة بالمسيحية في لحظة تاريخية معينة لما اتحدت الكنيسة مع الاستبداد وكانت اداة بتستخدم في فرض الدين
ولا فعلا الدين لازم يتفصل عن الدولة ودة يشمل المسيحية والاسلام والهندوسية بدون تفرقة لان الديان التلاتة ممكن يستخدموا السلطةوالدولة كاداة؟ او بالتحديد اللي بيتسخدموا الدين دة

تالتا هل المشكلة فعلا في استخدام الدولة في فرض دين معين ولا الموضوع اعمق من كدة لان حاليا الدول حتي اشدها قمع للاقليات مش بتقول وش كدة اللي مش علي الدين دة حنموته في جانب تاني هو حياد الدولة في اوقات بتكون الاغلبية ببتحرش بالاقلية او ان الدولة بتهتم بثقافة دين معين وتهمل دين تاني دة مش فرض دين اه دة حاجة تانية يعني الدولة تغمض عنيها والمسلمين وهما اكترية بتحرشوا بالمسحيين او العكس
وكمان في اوقات بتكون الامور السياسية والاقتصادية مرفوضة من عموم الناس لان معتقادتهم الدينية بتقولهم كدة يعني هما اللي بيفرضوا علي الدولة تعمل وما تعملش والشعب نفسة اللي بيدخلوا الدين في الدولة بتحريم حاجة معينة وبيخلوا الدولة تعمل قانون لكدة يعني الحكاية اعقد من مجرد عدم استخدام الدولة في فرض دين معين

رابع لو في ناس جت قالت وش كدة ان دينهم دة جين ودولة او اي حاجة علي نفس الخط دة سواء اسلام او هندوسية وعلي فكرة هما كمان عندهم نفس القصة
حنعمل اية طيب
بلاش لو كل او اغلب المواطنين مقتنعين ان دين معين هو اللى صح و دين ناس تانيه غلط. و شايفين ان لازم يكون فيه تضييق على الديانه التانية مهوا في الاخر حسب كلام لوك الموافقة دة عنصر مهم و الناس دية اغلبية الشعب حنعمل اية ساعتها
لانهم حينجحوا ويسقطوا اي حكومة لو حبوا
ماشي مش لازم يموتوا الاقلية ولا ياخدوا ممتكلتهم وحنسمع كلام لوك عن الحقوق التلات بس التضيق والغلاسة و الاضهاد ساعات بيكون مالهومش مالكة ماحنا عارفين محدش بيقولك انا حتضهدك وش كدة

واخيرا هل دة مدخل للعلمانية او العلمانية اه ولا علي حسب تعريفك انت للعلمانية لان تقريبا في ناس عندنا بتكرها وناس بتحبها وبتعركوا مع ان كل واحد عندة تعريف مختلف عنها ودة موضوع كبير وعايزة حلقات

(16)

دى كانت أراء جون لوك و اللى أثرت جداً فى الغرب و شكل العقد الإجتماعى هناك.

و بما ان لوك يعتبر أبو الليبراليه و الحريات و اللى ناس كتير بتتمنظر بأراءه و بيقولوا على نفسهم ليبراليين حتى لو هم مش كده, فإحنا جبنالك إختبار فيه كام طريقة كده من خلالها تقدر تعرف هل الشخص اللى قدامك ده ليبرالى بجد زى ما بيقول ولا ليبرالى بلاستيك. عاجبه الاسم و واخد الجانب الاقتصادي بتاعها وسايب الجانب الفكري والثقافي اللي ممكن يكون اهم واللي ممكن يكون الاساس يعني الاختبار دة تلات اجزاء

(17)

الاختبار الأولى: صاحبك او قريبك اللى بيدافع عن حبس أو منع كاتب أو فنان أو صحفى و بيفضل يزعق و يتكلم عن الحريات, شوف رد فعله لما الشخص اللى يتحبس يكون من إيدلوجيه أو تيار مختلف عنه, فلو لقيته عمال يبرر حبس الشخص و يقولك ان الأفكار بتعات الجدع دة بيتم إستخدامها بطريقه غلط و إن فكرهم أصلا هو سبب الإرهاب و علشان كده هو مش ضد حبسهم

اعرف ان صاحبك ده ليبرالي بلاستيك لأن الليبرالية دايماً مع حرية الفكر و ضد القمع

حتى لو الأفكار دى بتحرض على الإرهاب اية ؟ ايوة

التعامل مع الفكر المحرض علي العنف والارهاب دة امر مختلف عليه بين الاليبرالين .. الاليبرالين اللي بجد
ففى ناس قالت ان الفكر الإرهابى بيتحارب بالفكر اللي ذية وبس لان اللي بيحارب الفكر هو الفكر وفي ناس قالت ممكن نمنع او نعاقب الفكر دة بس منع محدود ضد الأفكار اللى بتحرض علي العنف و كمان يكون معاها اننا نحاربها بفكر مضاد يعني مش منع وقتل.

بس لو صحبك دة شايف انه عادي وممكن يبرر القتل والحبس علشان الأفكاره فده أكيد ليبرالي بلاستيك.

(فيديو) أفرم ياسيسي ولا تبالي

(18)

الاختبار التاني: هات كده دولة من الدول اللى صاحبك بيحبها و أساله عن مواقفها المتناقضه امريكا فرنسا وهكذا , مثلاً أن أمريكا بتقعد تعيط و تصوت على حقوق الإنسان وحقوق المراة والديمقراطية اللى ضايعه فى إيران و مش بنسمعلها صوت عن السعودية لانهم حلقاء طبعا انا مش قصدي ايران والسعودية انا بديك مثالين اختار انت اي بلدين
لو صاحبك بدأ يبرر للدولة اللي بيحبها و طلع بيمشى ورا اللى شعرهم أصفر و عنيهم ملونه مش ورا مبادئه.

أعرف ان صاحبك ليبرالي بلاستيك.

(فيديو) انت فاكر ان انا وانت بس اللي كدة .. انت بس اللي كدة ما تجمعش

(19)

الطريقة التالته و الأخيرة: أسأل صاحبك عن الحريات الشخصية لطايفه غيره, يعنى مثلاً لو انت فى مصر أسأله عن رأيه فى حرية العقيده بالنسبه للشيعه أو الملحدين أو لو ملحد أساله عن رأيه فى حرية العقيدة بالنسبه للإسلاميين المتشددين.

مش محتاج أقولك انه طبعاً لو ابتدى يبرر و فى الأخر قالك انه لازم يبقى فيه قيود عليهم هما بالذات فى حين انه مع حرية العقيده مع طايفته هو.

برضو صاحبك طلع ليبرالي بلاستيك
.
ايه دة يعني الليبرالية دة حاجة حلو اوي بقا لا مش شرط فيها الحلو والوخش ذي اي حاجة
اقولك حاجة حتستغربها الاسلاميين في بلدنا العربية اللي بيكرهوا الليبراليين وضعهم حيتحسن كتير جدا
لو اليبرالين العرب او البلاستيك كانوا لبيرالين بجد بس ليبرالين بجد مش بلاسيتك
ساعتها بس نقدر نتكلم ونمسك بقا الجانب الاقتصادي من الليبرالية والجانب الاقتصادي ونشيل باقي الشيلة نعارض نوافق واللة اللي شايفة حلوة خير وبركة واللي شايفة وحشة برضة مش مشكلة
وبالمرة برضة
مش كل واحد يقولك انه تفكيره السياسي علماني معناه انه ديمقراطي وتقدمي لا في علماني ديكاتور ورجعي وفي اسلامي مطاط وفي في بس دة اختبارات تانية نشوفها بعدين

(20)

وانت بتكلم صحبك عن جون لوك او بتعمله اختبار الليبرالي البلاستيك خلي بالك ممكن يطلع يتعصب وايدة تتطول فاممن حاجة ليك ولية انك تعمل شير ولايك وسيسكريب عشان يشوف الحلقة لوحدة ويعرف لوحدة انه ليبرالي بلاستيك من غير ما تتعركوا

نشوفكوا الحلقة الجاية

شارك الحلقة على: