خمس شروط لنضمن عدم تأثير الجهلة علي الانتخابات – مقطع من الحلقة ١٣

أقترح جون ستيوات ميل خمس اقتراحات للوصول الي برلمان جيد الاقتراع العلني المكشوف .. الفصل بين السلطات .. الدائرة العامة والخاصة .. الحد من مصاريف الدعاية .. قيود او مراحل للانتخابات

اجزاء من سكريبت الفيديو خمس شروط لنضمن عدم تأثير الجهلة علي الانتخابات

طيب لو قولنا ان الإستبداد ده وحش وإن المستبد المستنير ده انتظاره بيبهدلنا , وموافقين على الإنتخابات لان دة حق الانسان في الاختيار. وعايزين نجيب برلمان عدل
بس إحنا محتاجين ضمانات. ضمانات ان مش بعد كل ده يجيلى حكومة تلبسنا فى الحيطة.
هو كان قلقان وعايز يضمن ان عدد المصوتين اللى مش متعلمين ميلبسوناش في الحيطة ويجبولنا ناس جهلة وفى الأخر نلاقى نفسنا رحنا في داهية

ميل كان له حبة أفكار كدة،نقدر نلخصها في خمس حاجات
اولها الإقتراع المكشوف العلني، و دة عكس الإقتراع السرى اللي بيحصل دلوقتى، بمعنى أن كل الناس تبقى عارفة وشايفة على عينك كدة أنت دخلت تصوت لمين؟ فا مش هتخوش بقى تستخبى ورا ستارة،
لأ أنت بتقول يا جماعة أنا رايح اصوت لدة وادى ورقتى اهى، ونبقى عارفين ان الراجل دة صوت لده.
هو شاف ان لو الشخص عارف ان إختياره هيكون متشاف ومعلن فهو بنسبة كبيرة مش هيسئ إستخدام صوته, ولا هيختار المصلحة الشخصية ودة بناء علي فكره كدة ان اللي متاخفش تعمله في العلن بيكون صح غالبا
وإن كمان الاقتراع المكشوف هيقلل نسبة الرشاوى الإنتخابية
فأنت لو أنتخبت شخص فاسد عشان يعملك مصلحة شخصية هتكون معروف ولو شخص أتعرف انه بيقدم رشاوى فالناس اللى انتخبته هيكون اتعلم عليهم برضة وكله حيخاف من الفضيحة .

 

تاني حاجة أكد عليها ميل هو الفصل بين السلطات ودة حنيجيله بالتفصيل لما نتكلم عن الحاج مونتسكيو
تالت حاجة فكرة ان يكون في دائرة عامة ودائرة خاصة
الدائرة الخاصة دة فيها حقوق وماينقعش اي حد حتي لو حكومه منتخبة تتدخل في الدائرة الخاصة حاجة كدة اعقد من فكرة الحقوق التلاتة بتاع جون لوك اللي شفنها الحلقة العاشرة بس موضوع الدائرة الخاصة دة بتاعت ميل حنجيله بالتفصيل بعدين في حلقات تانية

 

رابع حاجة قالك ان عضو البرلمان مايخدش مرتب لانه بيشتغل للشعب اصلا ودة واجب عليه وكمان ميل طلب تحديد مصاريف الحملة الانتخابية يعني عشان اللي معاه فلوس ميأثرش علي الناس من كتر الدعاية

أخر حاجة اتكلم عليها ميل عشان نضمن ان النتيجة النهائية بتاعت الانتخابات ماتوديناش في داهية
هو اقترح بسرعة كدة حبة قيود على التصويت
عشان يقلل شوية من تأثير الناس اللى مش متعلمين, فكان بيقول ان هما ميصوتوش لفترة محددة او ان يكون في مراحل أو مثلا يكون من حق الناس المتعلمين يصوتوا مرتين يعنى مثلاً كانه بيقول اللى معاه دكتوراه هيصوت مرتين علشان نوازن مع اللي مش متعلمين
بس خلى بالك هو شاف فكرة الحد من تأثير الناس اللى مش متعلمة دى أو منعهم من التصويت لفترة معينة ومش على طول ومينفعش تتاخد حجه علشان نمنع الناس على طول, ده لو حصل بس علشان نجهزهم.
أصل ميل أهم حاجه بالنسبة ليه واللى بتحركه وى ما وضحنا هى حرية الإنسان واختياره ففكره تحديد التصويت دة حاجة عارضة وهوا ماركزش عليها اوي

شارك الحلقة على: