ضد ثورات الربیع العربي اللي خربت البلد – مقطع من الحلقة ٣

مش كل اللى رافضين مبدأ الثورة لازم يكونوا فاسدين و منتفعين, فيه ناس فكرها السياسى محافظ و ضد التغيير اللى بيحصل فجأة و مع الإصلاح واحده واحده. إدموند بروك \ بيرك كان رأيه كده هو كمان و كان ليه تبريراته.

اجزاء من سكريبت الفيديو الفلول اعداء الثورات …. وربما محافظين

الموضوع بدا في ديسمبر 2010 فى تونس و من بعديها مصر و ليبيا و سوريا و اليمن و بلاد تانيه كتير , الناس فيها نزلت الميادين و كانت بتطالب باسقاط النظام و بالحرية و العداله الإجتماعية .

بس فى نفس الوقت دة و فى نفس البلدان دية كان فيه مظاهرات مؤيده للانظمه و مش موافقه على اللى بيحصل ومش بالعين فكرة الثورة دية , و بغض النظر عن رايك فيهم , لو كنت شايفهم او لسه بتشوفهم فاسدين او منتفعين من نظام فاسد, بس الناس دى كان فيها اللى مقتنع فعلا باللى هو بيقوله.

اللى نزلوا يايدوا النظام و اللى منزلوش بس كانوا بيدعموه مش لازم يكونوا ناس فاسدة ومش لازم يكونو ناس مرتشين ولا اصحاب اعمال او مناصب هتتضر من وجود الثورة , الناس دى يا سيدى فكرها السياسى محافظ

في ناس بتعتبر الايرلاندي ادموند بروك \بيرك مؤسس الفكر المحافظ حاليا هو كان مؤمن جدا ان التغيير مينفعش عن طريق ثورات بتهدم كل حاجه موجوده و ان الحل الامثل هو التغيير التدريجى , يعنى بدل منقول الشعب يريد اسقاط النظام , نقول الشعب يريد اصلاح النظام.

و ده لان التغيير السريع و الغير محسوب فى النهاية بيؤدى لنتيجة عكسية غير اللى الناس نزلت علشان تحققها اصلا, زى كده ما حصل فى مصر وتونس لما تبصلها يعني من ناحية الإقتصاد و الامن والسياحة و نسبة البطالة وما بالك بقى بالحروب الاهليه في ليبا واليمن وسوريا.

بروك\بيرك كان متاثر جدا باحداث الثورة الفرنسية فى فترتها الاولى و الخراب و الفوضى اللى كان حاصل فى فرنسا في الوقت ده و ده كان من اسباب بلورة الفكر المحافظ عنده.

التوجه او الفكر المحافظ ده عباره عن الانسان بيكون حابب و حاسس بالامان و الراحة مع الافكار اللى موجوده او اللى اتولد و لقاها ايا كانت ايه هى الافكار دى , و بيكون شايف ان استمرار الافكار دى و استقرارها لفترة ده مش من فراغ و انت مينفعشي تيجي كده وتقولي ده فكر عواجيزى ولا كلام فلول.

و خلى بالك لو بصينا كويس و ركزنا هنلاقى ان كل واحد فينا حيكون في فكر محافظ بشكل او باخر , يعنى مثلا لو انت مش محافظ فى الافكار السياسية و عايز تغيير شامل و جذرى , ايه رأيك فى التغيير الجذرى فى الدين ؟ او نسميها تجديد الخطاب الدينى , يا سيدى بلاش الدين علشان منزعلش حد مننا , خليها علي الصعيد الشخصى و اسلوب الحياة و التفكير
الخلاصه ان الفكر المحافظ ده ممكن يكون موجود فى اى حد فينا, الشخص بيكون محافظ فى حاجات معينه لان المخاطر و التضحيات بيحس انها عاليه.

يعنى مش دايما عيب ان الواحد يكون تفكيره محافظ فى السياسة على فكرة انا هنا بتكلم و فارض حسن النيه و شايل من المعادله ديه الفاسدين و المنتفعين من الفساد والظلم و عايزينه كل حاجة تستمر و بيسموه الكلام ده استقرار , احنا هنا بنتكلم عن الناس العادية أهالينا و أصحابنا.
اصل..
(فيديو)

– دين ابو الفلول ودين ابو الاخوان ودين ابو رجال الاعمال ودين ابو ناهبي و ظالمي هذا البلد ودين ابو كل لي تشددلوم

– ودين ابوك ودين امك ودين جدك

اهالينا واصحابنا مش حيغيروا رائيهم لما يلاقوك بتشتمهم يافلول يافسده يا عبيد. اصل محدش بيقتنع لما تشتمه.
اهلك وصحابك ممكن يكون فيهم اللي مش لاقي ياكل اصلا عشان تقولو فاسد. هو تفكيره السياسي محافظ غلط بقى اوصح دة موضوع تاني بس عشان نغيرة لازم تخوشله من الناحية دية مش بالشتيمة والا الموضوع حيقلب..

(فيديو)

اسمع
بلاش جدال
انتو خونة للاسلام انتو خونة للاسلام
احنا خونة؟ احترم نفسك.

زي ما قولنا ادموند بروك \ بيرك كان رافض فكرة التغيير الجذرى و اللى بييجى على غفلة بناء على افكار مش من عادات و تقاليد المجتمع المتوارثه. وعشان كدة ناس كتير بتعتبرة من مؤسسى الفكر المحافظ الحالى و لو دورت هتلاقى احزاب كتير فى العالم جنب اسمهم كلمة conservative افكارهم ممكن تكون مستوحاه من فكر و فلسفة بروك \ بيرك .

على فكرة ادموند بروك \ بيرك مكنش دائما ضد التغيير على طول خط , بالعكس هو كان موافق على التغيير بس التغيير المتدرج و المبنى على تقاليد و افكار المجتمع
لو جينا بقه و بصينا على العقد الاجتماعى من وجهة نظربروك \بيرك. من وجهة نظره العقد ده معمول مع الناس اللى عايشة و اللى ماتت و اللى لسه هيتولد.
يعني فيه مساهمات قبل ما انت تكون موجود بعادات وتقاليد راسخة

شارك الحلقة على: