لو بتتخانق كتير بسبب السياسة على القهوة :) | من الحلقة1

كل الناس بتتكلم و بتتخانق بسبب السياسة و الأراء بتكون مختلفه, اللى شايف أن الديمقراطية متنفعش معانا و اللى شايف ان لازم الحاكم يبقى دكر و اللى شايف العكس خالص. كل ده قاله قبلنا فلاسفه و أتناقشوا فيه و طلعوا منه الحلو و الوحش. علشان كده, طلع الفيلسوف اللى جواك.

اجزاء من سكريبت الفيديو طلع الفيلسوف اللي جواك

– كلنا إتخانقنا على القهوة وفي المواصلات مع أصحابنا قبل كدة فى السياسة. اللى يقولك احنا شعب ميمشيش إلا بالكرباج يقولولاك لأ ده انت لو عدلت بين الحيوانات محدش فيهم هييجى على حق التانى.

– كل واحد فينا ليه رأي فى السياسة و كل واحد فينا بيسمع أراء ناس فى السياسة من أول سواق التوكتوك والتاكسي اللى بيشتكوا انه مش جايب همه لحد ست البيت اللي بتشتكي من غلو اسعار كل حاجة فى البلد. و بنعدى فى الطريق على هرتلة بعض الإعلاميين و هرج الناس على فيس بوك و تويتر لحد الكلام المجعلص اللى مش بنفهم منه ولا كلمة.

(فيديو لحاجة لعمرو حمزاوى)

– قلت التمييز ينبغي ان يكون بصورة محددة بين المعارك التي تصلح للتجميع بالمعنى الديمقراطي و المعارك التي تدفعنا باتجاهات انا اراها إنها ربما اتسمت بشيء من الغوغائية أو لم تقدم لنا الكثير.

– ديمقراطية؟ يا فرحتى، يا ابنى الكلام ده يمشى مع الناس بتوع برة اللى متعلمة و فاهمة لكن احنا ميمشيش معانا الكلام ده.

(فيديو لعمر سليمان)

For sure, everybody belives in the democracy. But when you will do that?

– احنا كل اللى احنا فيه ده بسبب غضب ربنا علينا. ”يا عم لن يذهب الغلاء حتى تتحجب النساء”

– وبعدين تعالالى هنا، عاجبك اللى احنا فيه ده دلوقتى؟ ما كنا قاعدين متكيفين و كان زمان جيمى بيحكمنا و بن على بيحلف يمين جديد فى تونس و أهى ناس بنت أصول و فى الكار دخ من زمان , فالحين بس تقولونا ديه حرية و ديمقراطية و تيجوا ساعة الجد و تقلبوا بطة بلدى وتقولولنا الديمقراطية مش بس صندوق الإنتخابات.

– الشرطة بتتضرب وبيتنططوا على الناس؟ طب و ايه يعنى؟ انت ماشوفتشو الشرطة فى أمريكا ده الست لما عدت الخط اللى الشرطة رسماه في المظاهرات بألّشوها. ايه يا جدعان هى الشرطة المفروض تبقى كيوت وحنينة؟

– هو ده التفتيش؟ لاء يا فندم ديه الصيانة مجانية كده بما ان حضرتك واقف عندنا في اللجنة.

– و بعدين أصلا أتلهى لما يبقى عندنا ناس متعلمة و متنورة ابقا تعالى كلمنى عن الديمقراطية و السياسة , يا عم ده نص شعبك مش متعلم ده لو اعتبرنا ان عندنا تعليم أصلا.

– إيه حكم العسكروحش ؟ يا عم مش أحسن ما نبقى زى سوريا و العراق، بقولك ايه الجيش والشعب إيد وحدة..

– أهو انت افضل اتكلم كدة و أرغى و اول ما نقول لك طب إيه الحل تعمل من بنها , طب عندك بديل؟

– بتسمع الكلام ده أو بتقوله؟ مبروك انت كدة بتتكلم فى الفلسفة السياسية أو النظرية السياسية. تخيل ان اللى انت بتقوله ده قاله قبلك فلاسفة من اللى بنقرا أساميهم فى الكتب او ندرسهم فى المدرسة و الجامعة و مبنفتكرش حد منهم بعد الإمتحانات.

– يعنى لو انت شايف أن هذا المجتمع لا يصلح للديمقراطية و أن لو سيبناها عايمة كدة كل واحد فينا هيروح يختارلو واحد صاحبه وحبيبه مش اللى هيعرف يمشى البلد ولااللى عنده علم وخبرةعشان يحكم فأنت كده أ فلاطون هذا العصر

– و لو انت من اللى بيقولوا ان البلد دى عايزة دكر يربط السايب و يُشكم الناس بقا و كل واحد يعرف حدوده و سيبك بقا من المعارضه و الكلام ده عايزين واحد معاه سلطة مطلقة علشان يعرف يظبط البلد. فأنت كده ماشى على خُطى توماس هوبس.

– و لو أنت شايف أن الثورة مجبتش غير الخراب و الدمار و كان المفروض نغير شوية شوية و نحافظ على المكتسبات اللي موجودة يبقى انت كدة بتفكر زي ايدموند بروك.

– بتناهد مع ناس كثي إن مصلحة الناس ككل ديه أهم حاجة فى السياسة و ان القرار لازم لما يتاخد يكون لمصلحة كل الناس. و أن الحاكم الحقيقى هو إرادة الشعب والحكام للي الموجودين هدفهم بس طب الارادة ديه فجان جاك روسو كان عايز يعمل زي كده زيك كدة.

– كل الفلاسفة دول جزء صغير من فلاسفة كتير هنتكلم عنهم أكتر فى الحلقات للي الجاية بس مش بنفس اسلوب المدرسة. لا. كأنهم قاعدين معانا على القهوة و نشوف بقا كل واحد منهم حهيقول ايه وهو قاعد بيشيش وسطينا هنا كده.

– مش قولتلك كل واحد فينا جواه فيلسوف صغير بس محتاج اللى يوجهه.

شارك الحلقة على: