8 | مواصفات الدولة لما تكون “شبة دولة”

الحلقة الثامنة

\هل تعيش في دولة غير حديثة او شبة دولة ؟ وما هي مواصفات الدولة غير الحديثة
فكرة العصبية والانتماءات الاولية وتأثيرها علي الحكم في بلدنا العربية حاليا

الحلقة الثامنة من برنامج ام السياسة بتشرح مفهوم الدولة غير الحديثة بخلط التاريخ مع علم الاجتماع بروح الفلسفة السياسية
هل لا تزال فكرة العصبيات المستخدمة في انشاء الدول بتعبير ابن خلدون موجودة في دولنا بصورتها الكلاسيكية او بصورتها الحديثة من عصبيات مصطنعة علي اساس المصالح المشتركة او الوظيفة كظباط الجيش مثلا
وما وضع الجيش تاريخيا في الدول غير الحديثة وما هو مدي التشابه مع الجيوش العربية حاليا ؟من ناحية الولاء والقرابة للحاكم والترقي ؟
هل ينتمي المواطن للدولة غير الحديثة ام ينتمي اكثر للانتماءات الاولية من قبيلة وعشيرة وناحية ودين وقرية ؟ وهل يشارك في الحكم او الانتخابات لاختيار من يحكم
هل توزع الثروات في الدولة غير الحديثة بناء علي الكفاءة ام علي القرب من العصبية

يبدو لنا ان الدول العربية دول غير حديثة مع اختلاف درجاتها من المحيط للخليج

سكريبت الحلقة

(1)

قلنا في اول حلقة ان ام السياسة بتعتنا متكونة من خلطة 4 فلاسفه الخلطة دية عملتلنا دولة غير حديثة. احنا شوفنا ال4 فلاسفة في الحلقات اللي فاتت واتكلمنا كمان عن العقد الاجتماعي وقلنا انها نظرية كانها بتجاوب علي سوال ليه بنسمع كلام الدولة؟

السؤال دلوقتي هى الدولة دى جت إزاى أصلاً؟ و اية وموضوع الدولة الحديثة دة؟

(2)

(فيديو)

  • نحمد ربنا انو حنا مش سوريا ولا ليبيا ولا العراق.

بنسمع كتير ان الجيش هو اللي حمى مصر من مصير سوريا والعراق و ليبيا.
وناس تانيه بتقول ما هواللي بيتعمل فينا دلوقتي هوه اللي حيودينا لمصير سوريا والعراق
وناس كمان تقولك مصر محمية طول عمرها عشان مذكورة في القرآن طب وتونس ؟

وفوق ده وده طبعا مش محتاج اقولك الناس اللي بتاخذ الاسلام كهوية او العروبة او كونك شيعي او سني كهوية واحدة وفوق الوطن. يعني الشيعي او المسلم او الكردي اللي ذي اهم عندي من مواطن بلدي المختلف عني في الطائفة او الدين.
وكمان اذاي نفسر موضوع الطائفية السياسية ده في لبنان و موضوع القبائل في مصر في سيناء.

كل ده حيخلينا نبص علي شوية تاريخ مخلطوين بعلم اجتماع بس بروح الفلسفة السياسة  في الحلقة دية والحلقة اللي جاية.

(3)

خلينا نبدأ من الاول وناخد الحدوتة من اولها في موضوع الدولة ده ما هوه مش معقولة كده الناس عايشة في قبائل وجمعات قلبت فجأة وبقت السويد والنرويج .

في ناس قالت ان تاريخيا سبب وجود الدولة هو مشاريع الري والتحكم في المايه وناس قالت الحروب. وناس حطت عوامل كتيرمع بعض  ذي الدين وذيادة عدد السكان والجغرافية.

 كل ده جميل بس دة مش موضوعنا لاننا عارفين ازاي الدول بتتنشأ وازاي بتتعمل وكل المنطقة بتاعتنا مليانة دول باستثناء فلسطين واحنا كلنا عارفين فلسطين مش عارفه تبقى دولة
ليه المشكلة هنا هل عندك دولة حديثه ولا لاء؟
واللي عنده دولة وبيحكمها هل بيحولها ويستثمر فيها عشان تبقى دولة حديثه؟
ولا بيعمل العكس وبتتفك منه ويحصلها ذي سوريا والعراق اللي فشلوا في بناء الامة.

(4)

توضيح كدة قبل ما نبدأ: احنا في الحلقة ديه والحلقة لي جايه منقصدش بالدولة الحديثة هنا العمارات العالية و المولات و العربيات الفخمة. كل ده مظاهر حداثة مش الحداثة نفسها.
وكمان حداثة الدولة ملهاش علاقة بهل هى كويسة ولا لأ وأفعالها خارج حدودها كويسة ولا لاء يعنى فرنسا مثلا بهدلت الجزائر و هى دولة حديثة و أمريكا بهدلت العراق و هى دولة حديثة. فدى نقرة و دى نقرة وعلي فكرة في تعريفات كتير لتوصيف حاله الدول بتاعتنا.
يعني دولة غنائمية   دولة ابوية   دولة وراثية وحط كمان شوية مصطلحات بالانجليزي.  بس احنا هنا للتبسيط حنسميها دولة غير حديثة.
واخيرا موضوع الدولة الحديثة دة مش نهاية التاريخ لاء دة في كلام بعدة بس دة مش موضوعنا دلوقته.

(فيديو)

  • خلاص؟
  • ومل حضرتك فاكر ايه يعني؟

(5)

 الدولة غير الحديثة وبالذات في منطقتنا كانت بتقوم على العصبيه بتعبير ابن خلدون . يعني ولاد قبيلة واحده ولا ولاد خاله وحاسيين ان مصالحهم ومصيرهم مشترك, بيقوموا لامين بعضهم و طالعين على الأرض اللى جنبنهم و واخدينها و مسيطرين عليها و هكذا لحد ما يسيطروا على حتة أرض كفاية و يعملو عليها الدولة بتاعتهم.

(فيديو)

  • هيا بنا يا رجال..

و غالباً الدولة دى بتلاقى اسمها على اسم صاحبها او العصبية اللي بتجمعهم فهتلاقى الدولة الفاطمية نسبة للسيدة فاطمه و الدوله العثمانية نسبة الى واحد اسمه عثمان الدولة الصفوية اتباع الحج صفي وهكذا.

 يعنى لو انت اسمك احمد و انت كبير الليلة فهيبقى اسم الدولة بتعتكو هو الدولة الأحمدية. ولو انتوا لعصبييه اللي مجمعاكو انكوا كلكوا جايين من شارع الهرم هتكون الدولة دي اسمها الدولة الهرمية.
 ممكن على فكرة الحاكم وعصبيته تكون مختلفة عن الناس اللي عايشين في حته الارض اللي مسيطرا عليها الدولة ديه وممكن كمان يكونوا بيتكلموا لغة تانيه  وعلى دين او مذهب مختلف عنهم .. اصل الناس بتكون عايشة وهما بيعملوا عليهم دولة.

المناصب الكبيرة في الدولة دية ما بمتروحش لاي حد بره العصبيه ديه. يعنى كلها بتكون على حسب العصبية  مش الكفائة.

(فيديو)

  • واخذ بالك يا قمر؟

(6)

لو شلنا فكرة السطو علي الارض اللى جنبك وضمها واختلاف اللغة بين العصبية اللي بيحكموا والمحكمومين ممكن نلاقي ان فكرة العصبية اللي بتحكم  وماسكة نفسها وليها كل المناصب الاساسية موجودة عندنا.
موجودة بشكلها الكلاسيكي سواء القبلية اوالقرابة في بعض الدول العربية لحد دلوقتي يعني كعائلة الملك او الامير بتمسك اهم المناصب في البلد.
وفي ناس بتاخد الخط ده لاخرة عشان تشرح الدول العربية الباقية  وتقول ايوة الناس عاشت في مدن وعددها و نسوا العصبيات دية او انتمائتهم الاولية بس برضة لسه بيحكموا بفكرة العصبية بس عصبية جديدة بناء علي مصالح طبقة معينة او الانتماء لمؤسسات معينة يعني مؤسسات امنية ابسط مثال ظباط جيش مثلا فيشكلوا عصبية مصطنعة هي اللي بتحكم وتسيطر علي كل المناصب.

(فيديو)

  • في اشباه دولة مش دولة حقيقة

اما بالنسبة لشكل وحدود الدولة غير الحديثة ديه تقريبا ملهاش حدود زي بتاعت انهارده
هيه حدودها بتكون عند اخر مكان تقدر تبعت ليه جيشك وتسيطر عليه يعني عند اخر عسكري
وممكن الحاكم يقعد مع حاكم الدولة اللي جنبه ويسبله حته ارض ويطلع منو بمصلحة.

اياميها مكنشي فى موضوع الحدود المرسومة بالمتر اوي ديه ومفهوم الدولة ام خريطة واضحة تحددلك حدود السيادة ومصادرك الطبيعيه بالمتر.

(7)

 طب والجيش؟!

(فيديو)

ايه ده كله يا فكيليتشه؟

كريتش؟

الجيش بتاع الدولة غير الحديثة اوقات كتير تاريخيا مبيكونش من عموم الناس اللى عايشين فى حتة الارض اللي الدولة دي مسيطرة عليها.
والجيش مبيكونش لحماية أو لخدمة المواطنين, هو بيكون علشان الحاكم او السلطان او العصبيه دي ,الجيش يكون متكون من أبناء العصبية اللى مكونة للدولة و مفيش مشكلة لو فيه شوية عبيد أو مرتزقه. بس ولائهم الاصلي للحاكم والعصبية وفي اوقات كتير تاريخيا بيكون فيه فصل بين الجنود وعموم الناس لدرجة ان كان في اوقات كان افراد الجيش بيعيشوا في معسكرات منفصلة و ممنعوين من التجارة والزواج والاختلاط بعموم الناس اللي عايشين في حته الارض للي هوما مسيطرين عليها.

يعنى عندك مثلا الدولة العثمانية قبل التنظيمات كان جزء مهم في جيشها و مؤسساتها الإدارية لفترة طويلة هم الإنكشاريين و دول عبارة عن شوية عيال صغيرين بيخطفوهم من القري المسيحية اللي مسيطره عليها الدولة العثمانية و بيربوهم على الإسلام و يعلموهم الإنضباط و بعد كده يبقوا رجال جيش ورجال دولة محترفين  بس ولائهم كان لفترة مش صغيرة  للسلطان بس. من الاخر ده جيش السلطان وبيشتغل باوامر السلطان او العصبية دي وممكن الجيش دة يقوم يموتوكوا كلكوا لو السلطان قلهم بس بستك عليهم.
ومهم جدا تكون علاقة قادة الجيش بالسلطان علاقات شخصية او قرابة او نسب و قيادات الجيش متنكونش شايفا نفسها جيش الشعب اللي ملك الشعب لا دة جيش الحاكم  اللي بيمشي باوامر الحاكم. والقادة بتوع الجيش ده لا يتخيلوا نفسهم في خدمة الشعب كمؤسسة مستقلة بغض النظر عن مين اللي بيحكم .

اما الناس العادية حتي لو خدوهم الجيش دة غصب واقتدار طبعا لازم يعرفوا انهم مينفعوش يوصلوا للمناصب العليا في الجيش . لانها محجوزة لابناء العصبية ديه  ذي ما قولنا.

(8)

طبعا شغل العبيد وخطف العيال الصغيرة بتاع المماليك و العثمانين واي دولة ثانية بتعمل نفس الحدوثة ديه مش موجود دلوقتي في دولنا الجميلة. بس فكرة ان قادة الجيوش لازم يكون ليها علاقة شخصية او حتي قرابه بالحاكم تتشاف النهاردة من المحيط للخليح وفكرة ان الجيش لا يري نفسه جيش الشعب وبيربط نفسة بالحاكم لانه جيش الحاكم تخليك تفكر في جيش القذافي وجيش الاسد لما ضربوا الناس بالطيارا. وموضوع انفصال افراد الجيش عن عامة الشعب يخليك تقكر في السكن والخدمات الخاصة اللي كان بيخادها الجيش السوري من ايام حافظ الاسد عشان ينعزل عن الشعب. وموضوع ان عموم الشعب مش بتخش الجيش وتترقي سواسية يفكرك بالعراق فموضوع السنه والشيعة والجيش.

وحسيبك انت بقى تفكر في الموضوع ده في مصر والسعودية واليمن والمغرب وهكذا
علي فكرة مش لازم كلهم يكونوا جيوش وحشين ذي سوريا ولا لازم هوما كونو بيفكروا يطلعوا يموتوا الناس  كلها.
لا. ممكن وممكن. الفكرة هنا ان احنا محشورين في العصر اللي فات بحلوه ومره
ففكرة الدولة الحديثة بمميازتها وعيوبها  لسة مش راكبه علينا. مش قولتلك قلب السياسة عندنا متجمد في القرن ال ١٨ والباقي كله شكليات.

(9)

تاريخيا بقى، علاقتك بالدولة غير الحديثة ديه كمواطن او خلينا نقول رعية أحسن
تقريبا هي مش موجوده و مش بتمثلك ولا بتعبر عنك, وطبعا ملكش تدخل في تفاصيل الحكم ولا هيحاربوا مين ولا هيصالحوا مين ولا هيبيعوا حتة الارض ديه لمين ولا بتقرر مين حيحكم ولا حيعمل ايه انتا عايش هنا زي الضيف والحاكم ومعاه عصبيته هما اللي في ايديهم كل حاجة.

ممكن يكونوا زي ما قولنا اللي بيحكموا ناس كويسة وممكن يكونوا ولاد تييت. التاريخ في من دول وفي من دول بس في الحالتين انت عايش تابع وملكش اي تحكم في الدولة دية وهي مش هدفها الاساسي انها تشتغل عشانك ولا تمثلك. انت عايش في حته الارض اللي هما بيحكموها.

وموضوع الانتماء هنا محدش كان بيعرف نفسه و يقلك انا من مواطني الدولة الايوبيه او من مواطني الدولة الصفوية مثلا. انتا انتمائك اصلا بيكون لانتماءات اللي بيتقال عليها الانتماءات الاولية اللي انت اتولدت لقيتها ومعملتهاش ومتعرفش تغيرها ذي انتمائك  للناحية او الجهة او القبيلة او الطائفه او القرية او الدين او المدينة اللي انت عايش فيها.
ورئيس الحاجه دي بقة هوه اللي بتروحلوا يحلك مشاكلك  وله سلطة مباشره عليك في الجواز  والطلاق والخناقات والتجارة  لانك عايش جوا المنظومة دية.

اما الدولة دية حاجة بعيدة ولا بتشوفك كشخص له حقوق لة قيمه كفرد ولا انت بتشوف الدولة دية بتاعتك تعبر عنك وتمثلك.
الدولة بتشوفك كجزء من طايفة او عشيرة او قبيلة وبيتعملوا مع الكبير بتاعكم  وكان في اوقات كتيرة بيحطوا قوانين للطايفة ديه كلها باللي عايشين فيها يجبروهم يلبسوا حاجة معينه او يشتغلوا شغلنات معينة وهكذا.
انت بقى عشان تتعامل في حياتك لازم تعرف نفسك  بانتماءاتك الاولية عشان تعرف تتعامل وتاخد حقك يعني لو انت من عيلة او طايفة او قبيلة كبيرة الناس تخاف منك لان الناس اصلا مش سواسية ولا قدام القانون ولا في العرف الماشي وبالذات لو حظك اسود وكنت من عصبية او اقلية عددهم قليل اوي.

المهم، انت بتحتاج لانتماءاتك الاولية دية عشان تعرف تتعامل في حياتك اليومية    وتتعامل مع الدولة.
ولو حصل مشكلة بينك وبين واحد تاني رؤساء القبائل او القري او العشائر بيقعدوا مع بعض في حاجة كدة بينسميها دلوقتي المحاكم العرفية.

يعني رئيس القبيلة او الطائقة او القرية لي انت فيها او خلينا نقول عليهم دول رئيس انتمائتك الاولية. بيكون ليهم  سلطة سياسة عليك ممكن تكون اهم واقوي من سلطة الدولة غير الحديثة عليك.

(10)

(فيديو)

  • شكون حنا؟؟

طبعا مش محتاج اقولك ان احنا كمواطنين من المحيط للخليج ليه يفضل يتقال علينا رعيه في دولة غير حديثة حتي لو اختلفت الدرجات. يعني دة لو بصتلها من ناحيه تدخل ومشاركة المواطن العادي في امور الحكم واختيار حكامه من ناحيه ومن ناحية ثانية الدولة ديه هل بتعبر عن المواطن؟
ضيف علي دة كمان احتياج المواطن لانتماءاته الاولية عشان يضمن حقه او يحمي نفسه  باختلاف درجاته يعني الاشد بيكون في العراق وسوريا واد ايه المواطن الكردي ولا الشيعي ولا العلوي ولا الدروزي بياخد تعامل مختلف من الدولة لان الدولة لا تري الناس مواطنين بل رعية بينتموا لانتمائتهم الاولية.
وممكن تسال بعد كل دة لية الشيعة والاكراد مثلا بيحسوا بانتمائهم اكتر للشيعة او الاكراد في بلد تاني  اكتر من مواطني دولتهم، لو كان عربي او سني او كذا..
ولا مواطنين القبائل في سيناء في مصر وليه كل واحد لازم ينتمي لقبيلة  عشان توفرله الحماية  واذاي الدولة بتشارك في المحاكم العرفية وقعدات العرب  ديه؟

وممكن ندخل كمان هنا الامازيغ في المغرب والجزائر وفكره ان الدولة مش شايفه الي حد كبير لغتهم وثافقتهم  ومش بتعبر عنهم مع ان  عددهم ضخم فمبالك بالامازبغ المصريين ايوة في امازيع في مصر بس عددهم قليل جدا ويقال ان لغتهم الامازيغية انقي حتي من لغة الامازيغ في المغرب لانهم لم يخطلتوا بالمدن يعني.
المهم موضوع التمثيل والتعبير عن المواطنين في الدولة غير الحديثة ده مالوش علاقة باللي عايشين سواء اغلبيه او اقلية لا دة له علاقة بحكام الدولة دية بيشفوا ان الدولة دية تكون ايه وتعبر عن ايه وتمثل مين عاى حسب مزاجهم وعصبيتهم.

(11)

و لو انت عايش فى حتة متطرفه من الدولة غير الحديثة دية وبعيد عن العصبية اللي بتحكم فتاريخيا أنت ممكن متشوفش منها غير بتاع الضرايب و هو جاى يقاسمك فى رزقك.

(فيديو)

  • الضرايب.. مصلحتك أولاً.

الدولة غير الحديثة في العصور دية مش بتديك خدمات. اخرها تامن طرق تجاره. تبنى دور عبادة. بس في الغالب.. طبعا دور عبادة عشان يمجدوا نفسهم و تتسمي علي اساميهم والتاريخ مليان مساجد للشيعة بناها سلطان بيحكم ناس سنه او العكس او حكام وقفوا بناء كنايس للناس اللي عايشة لان الحاكم وعصبيته مش مسيحية.
العلاقة بينك وبين الدولة دي ممكن تكون محصورة في الضرايب او الجزية او الخراج او انك واخدينك في الجيش بالعافية وطبعا مش هتكون قائد في الجيش ده لانك مش من العصبية الحاكمة زي ما شرحنا.

ومهم جدا ان  الدولة دي لو هتعمل مشاريع مايه ولا طرق ولا مواني فده اساسا هيكون عشان يعرفوا يحلبوا حتة الارض اللي انت عايش عليها ويطلعوا منها رزقهم.

فالهدف ان العصبية نفسها للي بتحكم تتغدى فالمصادر والخير بتاعت الارض دية ليهم اساسا وحيعمروا الارض دية مش عشانك. انت بتجي علي السكة انما الاصل ليهم هما ببساطة موارد الدوله للي في الحكم مش لسكانها. طبعا في التاريخ في حكام وعصبيات من نفسهم كانوا بيعاملوا الناس كويس ويدوهم حقهم بس ده من نفسهم مش ملزم . التاريخ فيه من دة ومن دة.

(12)

فكر كدة في خدمات الدولة وشوف الهدف اللي بتتعمل عشانه  والعائد بتاع المشاريع وخير البلد دة بيروح فين  وتوزيع الثروة فيها بيحصل علي اساس ايه؟  الكفائة ولا انتمائك للعصبية الحاكمة سواء عصبية وانتماءات اولية او عصبية مصطنعة زي ما شرحنا..

(فيديو)

  • ايه؟ 

بناء علي كل العوامل دية شكلنا كدة احنا عايشين في دولة غير حديثة بحلوها ومرها وفكرة الدولة الحديثة دية مش واضحه. ممكن يكون حظك في حاكم كويس وعصبيته بنت حلال بس في الاخر هي دولة غير حديثة وسميها زي ما انت عايز تسميها.

(13)

بس اذاي النقلة من الدولة الغير حديثة لدولة حديثة دة حصلت وازاي نعمل كدة عندنا واذاي بيتعملوا مع موضوع والانتمائات الاولية دة؟
دة حيكون  موضوعنا الحلقة الجاية.

فكر كدة لحد ما نشوفك الحلقة الجاية وقولنا هوا ايه اهم حاجة  ممكن الدولة تعملها عشان  تخليك تحس انك في دولة حديثة ؟

ماتنسوش تعملونا شير وليك وسابيسكريب

نشوفكو الحلقة الجاية..

شارك الحلقة على: